दाङ । सरकारले डिजिटल सुशासन सुदृढ गर्ने दीर्घकालीन लक्ष्यअनुसार नागरिक सेवाहरूलाई अनलाइनमार्फत उपलब्ध गराउने अभियानलाई योजनाबद्ध रूपमा अघि बढाएको छ ।
यसै क्रममा निजामती कर्मचारीको व्यक्तिगत विवरण, लोक सेवा आयोगका परीक्षार्थीको प्रवेशपत्र तथा वैदेशिक अध्ययनका लागि आवश्यक ‘नो अब्जेक्सन सर्टिफिकेट’ (एनओसी) नागरिक एपमार्फत उपलब्ध गराउने व्यवस्था अन्तिम चरणमा पुगेको छ ।
सूचना प्रविधि विभागका महानिर्देशक चन्द्र साहका अनुसार उक्त प्रणाली हाल परीक्षण चरणमा रहेको र आगामी एक हप्ताभित्र पूर्ण रूपमा कार्यान्वयनमा आउनेछ ।
चैत १३ गते मन्त्रिपरिषदबाट स्वीकृत ‘शासकीय सुधारसम्बन्धी एक सय कार्यसूची’ अन्तर्गत बुँदा नम्बर ३५ मा यो विषय समेटिएको थियो । सो बुँदा कार्यान्वयनका लागि सञ्चार तथा सूचना प्रविधि मन्त्रालयले समयसीमासहित कार्ययोजना तयार गरी सम्बन्धित निकायलाई तोकिएको अवधिभित्र काम सम्पन्न गर्न निर्देशन दिएको छ ।
सञ्चार तथा सूचना प्रविधिमन्त्री डा. विक्रम तिमिल्सिनाले मातहतका निकायलाई नागरिक एपमार्फत थप सेवा एकीकृत गर्न तथा डिजिटल प्लेटफर्ममार्फत सेवा विस्तारलाई तीव्रता दिन निर्देशन दिनुभएको छ ।
मन्त्रीस्तरीय निर्देशनपछि सूचना प्रविधि विभागले विभिन्न सरकारी तथा प्राविधिक निकायसँग समन्वय सुरु गरिसकेको छ । सोही क्रममा नेपाल इन्जिनियरिङ परिषद्सँग सम्झौता गरी व्यवसायिक इन्जिनियरहरूको प्रमाणपत्रसमेत नागरिक एपबाट उपलब्ध गराउने प्रक्रिया अघि बढाइएको विभागका महानिर्देशक साहले जानकारी दिनुभयो ।
नयाँ प्रणाली लागू भएपछि नागरिकहरूले नागरिक एपमार्फत विभिन्न महत्वपूर्ण सेवा प्राप्त गर्न सक्नेछन् । यसअन्तर्गत लोक सेवा आयोगका परीक्षार्थीले प्रवेशपत्र, वैदेशिक अध्ययनका लागि एनओसी, तथा निजामती कर्मचारीले आफ्नो व्यक्तिगत विवरण एपबाटै प्राप्त गर्न सक्नेछन् ।
यसअघि नै नागरिक एपमार्फत प्रहरी चारित्रिक प्रमाणपत्र (पुलिस क्लियरेन्स रिपोर्ट) उपलब्ध गराउने सेवा सञ्चालनमा आइसकेको छ । अब थप सेवा एकीकृत भएसँगै नागरिक एपलाई ‘वन–स्टप डिजिटल सेवा प्लेटफर्म’ बनाउने सरकारको योजना थप सशक्त हुने अपेक्षा गरिएको छ ।
