दाङ । दाङको तुलसीपुरमा रहेको हाम्रो पहुँच बहुउद्देश्यीय सहकारी संस्थाले आफ्ना शेयर सदस्यहरुलाई आधारभूत सहकारी शिक्षा सम्बन्धी तालिम प्रदान गरेको छ ।
तुलसीपुर उपमहानगरपालिका–७ झुमरेमा रहेको सहकारीले आज (शनिबार) एक कार्यक्रमको आयोजना गरी सहकारी सम्बन्धी ज्ञान अभिवृद्धि गर्ने उद्देश्यले सदस्यहरुलाई आधारभुत सहकारी शिक्षा सम्बन्धि तालिम प्रदान गरेको हो ।
संस्थाका अध्यक्ष शुक्रराज भण्डारीले सहकारीका शेयर सदस्यलाई सहकारी शिक्षा तालिम प्रदान गर्नुभएको हो । उहाँले शेयर सदस्य सहकारीमा आवद्ध भएरमात्रै नहुने भन्दै सहकारी सम्बन्धि ज्ञानको आवश्यकता पनि आवश्यक भएकाले हाम्रो पहुँचले शेयर सदस्यहरुलाई सहकारी शिक्षा प्रदान गरेको बताउनुभयो ।
संस्थाले सदस्यलाई सहकारी सम्बन्धि सचेतना दिन प्रत्येक महिनाको अन्तीम शनिबार सहकारी शिक्षा तालिम प्रदान गर्ने गरेको बताउनुभयो । तालिममा सहकारी अवधारणा, यसको अर्थ, महत्व, बचत कसरी गर्ने लगायतका विषयमा सदस्यलाई जानकारी गराइएको हो ।
संस्थाका तालिम सूचना तथा अध्ययन उपसमितिका सदस्य भौनाराम चौधरीको अध्यक्षतामा भएको तालिमको सहजीकरण संस्थाका प्रमुख कार्यकारी अधिकृत डिआर भण्डारीले गर्नुभएको हो ।
सहकारीमा अहिले ५ हजार बढी शेयर सदस्य आवद्ध रहेका छन् भने १ सय १२ जनाले प्रत्यक्ष रुपमा रोजगारी पाएका छन् ।
