दाङ। गत भदौ १० गते रसुवाको भोटेकोशी नदीमा आएको बाढीपछि बेपत्ता व्यक्तिको पहिचानका लागि दाङमा ३७ जनाको परिवारको डीएनए नमुना संकलन गरिएको छ । बाढीपछि सम्पर्कविहीन भएका आफन्तको खोजीमा रहेका परिवारका सदस्यले डिएनए परीक्षणका लागि आज मंगलबार रगतको नमूना दिएका हुन ।
जिल्ला प्रशासन कार्यालय दाङका अनुसार आज राप्ती प्रादेशिक अस्पताल तुलसीपुरमा २३ जना र राप्ती स्वास्थ्य बिज्ञान प्रतिष्ठान घोराहीमा १४ जना गरी ३७ जनाको डिएनए नमुना संकलन गरिएको हो ।
बाढीपहिरोमा परी बेपत्ता भएका व्यक्तिको शव फेला परेमा पहिचान गर्न सहज हुने भएकाले आफन्तको डीएनए नमुना संकलन गरिएको प्रशासनले जनाएको छ । बाढीपहिरोमा परी आफन्त हराइरहेका व्यक्तिले डीएनए नमुना दिन चाहेमा जिल्ला प्रहरी कार्यालय दाङमा सम्पर्क गर्न प्रशासनले अनुरोध गरेको छ ।
यसैबीच बाढीपहिरोमा परेर दाङका ६० जना अझै सम्पर्कविहीन रहेको रहेको जिल्ला प्रशासन कार्यालयले जनाएको छ । सम्पर्कविहीन हुनेमा ५० जना पुरुष र १० जना महिला रहेका छन् । तीमध्ये ६ जना पुरुष भने सम्पर्कमा आएका छन् ।
हाल ४४ जना पुरुष र १० जना महिला गरी ५४ जनाको खोज तथा उद्धार हुन बाँकी रहेकोे प्रशासनले जनाएको छ ।
