दाङ । दाङको तुलसीपुरमा लागूऔषध ब्राउन सुगरजस्तो देखिने पदार्थसहित एक जना पक्राउ परेका छन् ।
पक्राउ पर्नेमा तुलसीपुर उपमहानगरपालिका–१४ रामनगर टोल निवासी ५१ वर्षीय ललितराज कुँवर क्षेत्री रहेको जिल्ला प्रहरी कार्यालय दाङले जनाएको छ ।
प्रहरीका अनुसार कुँवरले आफ्नै घरमा लागूऔषध ब्राउन सुगरको कारोबार गरिरहेको भन्ने गोप्य सूचनाका आधारमा खटिएको प्रहरी टोलीले कात्तिक १७ गते दिउँसो करिब साढे ३ बजे उहाँलाई नियन्त्रणमा लिएको हो ।
प्रहरीले उहाँको घरमा खानतलासी गर्ने क्रममा कोठामा लुकाइछिपाइ राखेको ५ ग्राम ३०० मिलिग्राम ब्राउन सुगरजस्तो देखिने पदार्थ बरामद गरेको जनाएको छ ।
त्यसैगरी, विभिन्न दरका नेपाली नगद ७ हजार ६ सय ८० रुपैयाँ र दुई थान मोबाइलसमेत बरामद गरिएको प्रहरीले जनाएको छ ।
पक्राउ परेका कुँवरलाई दाङ जिल्ला अदालतबाट १० दिनको म्याद थप गरी थप अनुसन्धान भइरहेको जिल्ला प्रहरी कार्यालय दाङका प्रहरी नायव उपरीक्षक डा. हेमबहादुर केसीले जानकारी दिनुभएको छ ।
