दाङ। सरकारले स्थानीय पाठ्यक्रम अनिवार्य विषयका रुपमा पढाउने नीति ल्याए पनि तुलसीपुरका धेरैजसो निजि विद्यालयहरुले त्यसलाई कार्यान्वयन आनकानी गरेका छन् । कतिपयले भने ऐच्छिक विषयको रुपमा अध्यापन गराउँदै आएको शिक्षा, युवा तथा खेलकूद महाशाखाका प्रमुख चक्र भण्डारीले बताउनुभयो ।
१ देखि कक्षा ८ सम्म स्थानीय पाठ्यक्रमलाई अनिवार्य विषयका रुपमा पढाउनुपर्ने नीति भए पनि कतिपय संस्थागत विद्यालयहरुले कक्षा ८ मा मात्रै स्थानीय पाठ्यक्रम हाम्रो तुलसीपुर अध्यापन गराइरहेको भन्ने जानकारी आएको महाशाखा प्रमुख भण्डारीले बताउनुभयो । विद्यालयहरुले अटेरी गरिरहेका छन् । तर ८ कक्षाको परीक्षा पालिकाले लिने व्यवस्थाले स्थानीय पाठ्यक्रम बाध्यताले अध्यापन गराएको उहाँले बताउनुभयो ।
स्थानीय पाठ्यक्रमलाई संस्थागत विद्यालयहरुले अतिरिक्त विषयका रुपमा अध्यापन गराइरहेको भन्दै महाशाखामा विभिन्न व्यक्तिहरुले उजुरी दिएका छन् भने पालिकाले त्यस्ता विद्यालयमा छड्के अनुगमन गर्ने तयारी गरेको महाशाखा प्रमुख भण्डारीले बताउनुभयो ।
अनुगमनका क्रममा लापरवाही गरेको पाइएमा वा स्थानीय पाठ्यक्रमलाई १ देखि ८ कक्षासम्मै पूर्णरुपमा लागू नगरेको र अतिरिक्त विषयका रुपमा अध्यापन गराएको पाइएमा शिक्षा नीतिअनुसार तत्काल कारवाही हुने बताउनुभयो । एकराज भण्डारीले नयाँ युगबोध राष्ट्रिय दैनिकमा खबर लेख्नुभएको छ ।
