दाङ । लगातारको वर्षाका कारण प्रभावित जनजीवन सामान्य बन्दै गएको छ । शुक्रबारदेखि देशका विभिन्न स्थानमा भइरहेको वर्षा शनिबार दिउँसोपछि क्रमशः रोकिएसँगै जनजीवन सामान्य बन्दै गएको हो ।
वर्षा रोकिएपछि दाङ उपत्यकासहित देशका अधिकांश स्थानमा आजदेखि मौसम खुल्ने मौसम पूर्वानुमान महाशाखाले जनाएको छ । बंगालको खाडीमा विकसित ‘अर्नब’ नामक चक्रवातको प्रभावका कारण शुक्रबारदेखि देशका धेरैजसो स्थानमा वर्षा भएको थियो ।
चक्रवातको प्रभावले देशका विभिन्न क्षेत्रमा बदलीसँगै वर्षा हुँदा जनजीवन प्रभावित भएको थियो । उच्च हिमाली तथा पहाडी भेगमा बाक्लो हिमपात हुनुका साथै देशका धेरै स्थानमा हल्कादेखि मध्यम वर्षा भएको थियो ।
शुक्रबार बिहानदेखि सुरु भएको वर्षा शनिबार दिउँसोसम्म निरन्तरजस्तै भइरहँदा सर्वसाधारणको दैनिक गतिविधिमा समेत प्रभाव परेको थियो । वर्षाका कारण सडक तथा बजार क्षेत्रमा चहलपहल कम हुनुका साथै नियमित कामकाजमा समेत असहजता उत्पन्न भएको थियो । तर, शनिबार दिउँसोपछि वर्षा रोकिन थालेसँगै मौसममा सुधार देखिएको छ ।
मौसम पूर्वानुमान महाशाखाका अनुसार ‘अर्नब’ चक्रवात शनिबारदेखि निष्क्रिय भएको छ । चक्रवातको प्रभाव कमजोर बन्दै गएपछि देशका अधिकांश स्थानमा वर्षा रोकिएको हो ।
मौसमविद् रोजन लामिछानेका अनुसार चक्रवातको प्रभावका कारण देशका विभिन्न स्थानमा वर्षा र उच्च हिमाली क्षेत्रमा हिमपात भए पनि प्रणाली कमजोर भएसँगै मौसममा क्रमिक सुधार आएको छ ।
वर्षा रोकिएसँगै दाङ उपत्यकासहित देशका अधिकांश स्थानमा आजदेखि मौसम खुल्ने अपेक्षा गरिएको छ । मौसममा सुधार आएसँगै सर्वसाधारणको दैनिक जनजीवन थप सहज हुने देखिएको छ ।
