दाङ ।
दाङको तुलसीपुरको राप्ती लाइफ केयर अस्पताल प्रालिका अध्यक्ष एवं समाजसेवी हरिप्रसाद रिजालले आफ्नो जन्मदिन मानवीय सेवाका साथ मनाउनुभएको छ । रिजालले आफ्नो जन्मदिनको अवसरमा तुलसीपुरस्थित मानव सेवा आश्रममा आश्रित असहाय तथा बेसहारा व्यक्तिहरूलाई बिहिबार बिहानको भोजन गराउनुभएको हो ।
तुलसीपुर क्षेत्रको स्वास्थ्य र सामाजिक क्षेत्रमा सक्रिय रिजालले तडकभडक र खर्चिलो उत्सव मनाउनुको साटो आश्रममा रहेका आमाबुबा र बालबालिकाहरूलाई भोजन गराएर जन्मदिन मनाउनुभएको हो ।
अध्यक्ष रिजालले जन्मदिनमा गरिने फजुल खर्चलाई कटाएर असहायहरूको सेवामा लगाउन पाउँदा छुट्टै आत्मसन्तुष्टि हुने बताउनुभयो । सानो सहयोगले कसैको अनुहारमा मुस्कान ल्याउन सकिने उहाँको भनाई छ ।
आश्रमका प्रमुख हिरु जोशीले रिजालको यस कार्यप्रति कृतज्ञता व्यक्त गर्दै जन्मदिनको शुभकामना अर्पण गर्नुभएको छ । उहाँका अनुसार यस्ता मनकारी व्यक्तिहरूको सहयोगकै कारण सडकमा रहेका बेसहाराहरूको लालनपालन र संरक्षणमा ठूलो टेवा पुग्दै आएको छ ।
त्यस अवसरमा राप्ती लाइफ केयर अस्पतालले आश्रममा आश्रित व्यक्तिको स्वास्थ्य निशुल्करुपमा जाँच समेत गरेको छ । अध्यक्ष रिजालले अबदेखि अस्पतालले तीन÷तीन महिनामा आश्रममा आश्रित नागरिकको स्वास्थ्य निशुल्करुपमा जाँच गर्ने प्रतिवद्धताा जनाउनुभएको छ । यस्तै समस्या भएका बिरामीलाई अस्पतालले उपचारमा सहयोग गर्ने उहाँले बताउनुभयो ।
कार्यक्रममा हस्पिटल एड्मिनिट्रेसन एण्ड अपरेशन हेड बिमकला रिजाल, डा. रितेश शर्मा, तुलराज बराल, सपना बुढाथोकी, माधव खत्री लगायत अस्पतालका कर्मचारी, उहाँका शुभचिन्तक र परिवारका सदस्यहरूको समेत उपस्थिति रहेको थियो । यसअघि पनि रिजालले विभिन्न सामाजिक र परोपकारी कार्यहरूमा आफ्नो उपस्थिति जनाउँदै आउनुभएको छ ।।
