दाङ। दाङ तुलसीपुर उपमहानगरपालिकाले पशुपालक किसानहरूलाई प्रत्यक्ष लाभ पुर्याउने उद्देश्यले गोठमै पुगेर निःशुल्करुपमा पशु उपचार सेवाको औपचारिक सुरुवात गरेको छ । पशु प्राविधिक नवराज रेग्मीले पशुको उपचार गरेर नि : शुल्क उपचार सेवाको शुभारम्भ गरिएको हो ।
बिहिबार वडा नम्बर ८ गहतेस्थित पशुपालक किसान शसिराम बुढाथोकीको गाई फर्ममा रहेका पशुहरूको उपचार गर्दै उपमहानगरपालिकाले यस अभियानको थालनी गरेको हो ।
गोठमै पुगेर पशुको निशुल्क उपचार कार्यक्रमका लागि उपमहानगरपालिकाले चालु आर्थिक वर्षमा ४ लाख रुपैयाँ बजेट विनियोजन गरेको छ । नगरप्रमुख टिकाराम खड्काले यो सुरुवात मात्र भएको र आगामी आर्थिक वर्षमा किसानहरूको माग र आवश्यकतालाई हेरेर बजेटमा थप वृद्धि गर्न सकिने बताउनुभयो ।
नगरका सबै किसानले यो सेवा सहजै पाउने वातावरण निर्माण गरिने उहाँले बताउनुभयो । विगत लामो समयदेखि गाई पाल्दै आउनुभएका व्यावसायिक किसान शसिराम बुढाथोकीले गोठमै निःशुल्क सेवा पाउँदा निकै राहत महसुस बताउनुभयो ।
बेलाबेलामा पशुवस्तुमा देखिने स्वास्थ्य समस्या समाधानका लागि यसअघि निजी प्राविधिकहरूलाई ठुलो रकम खर्च गर्नुपर्ने बाध्यता रहेकोमा अब स्थानीय सरकारले घरदैलोमै सेवा पुर्याएपछि उहाँ उत्साहित हुनुहुन्छ ।
पशु बिरामी पर्दा कि त पशुसेवा शाखासम्म पशुलाई लैजानुपर्ने कि त महँगो शुल्क तिरेर निजी प्राविधिक गोठमा बोलाउनुपर्ने अवस्थाको अन्त्य भएपछि अन्य किसानहरू पनि खुसी भएका छन् ।
तुलसीपुर–७ श्रीगैंका भैंसीपालक किसान छविलाल भण्डारी र तुलसीपुर–३ का गाईपालक किसान बिष्णुप्रसाद शर्माले यो कार्यक्रमले व्यावसायिक पशुपालनमा लागेकाहरूलाई ठुलो आर्थिक र प्राविधिक सहयोग पुग्ने बताउनुभयो ।
पशु सेवा शाखाका प्रमुख डा. मनोज वलीका अनुसार उपमहानगरपालिकाका १९ वटै वडाका किसानले यो सेवा लिन सक्नेछन् । यद्यपि, तुलसीपुरको स्थायी बासिन्दा नभएकाहरूको हकमा भने व्यावसायिक रूपमा पशुपालन गरेको हुनुपर्ने प्रावधान राखिएको छ ।
यसअघि पनि कृत्रिम गर्भाधान र सुत्केरी पशुलाई आहारा वितरण जस्ता कार्यक्रम सञ्चालन गरिसकेको उपमहानगरले अहिलेको उपचार सेवामार्फत पशु स्वास्थ्यलाई थप प्राथमिकतामा राखेको छ ।
पशु उपचार सेवा उद्घाटन कार्यक्रममा तुलसीपुर उपमहागरपालिकाका प्रमुख प्रशासकिय अधिकृत केशवराज पार्धेले किसानलाई बिरामी पशुको उपचार गराउन समस्या भएकाले उपमहानगरपालिकाले गोठमै पुगेर उपचार सेवा शुरु गरिएको बताउनुभयो ।
तुलसीपुर उपमहानगरपालिका कृषि शाखाका संयोजक लक्ष्मण चौधरीको अध्यक्षतामा कार्यक्रम भएको हो । कार्यक्रमको सहजीकरण पशु सेवा शाखाका सुनिता शर्माले गर्नुभएको हो ।
