रोल्पा । रोल्पाको परिवर्तन गाउँपालिकामा गएको पहिरोमा पुरिएर एक जना बेपत्ता भएका छन् । अविरल वर्षासँगै गएको पहिरोमा परी परिवर्तन गाउँपालिका वडा नम्बर ४ पाछावाङ सल्लाबोटका अन्दाजी ५७ वर्षका देउ प्रसाद घर्ती पहिरोमा पुरिएको प्रहरीले जनाएको छ ।
गएराति परेको अविरल वर्षाका कारण परिवर्तन गाउँपालिका वडा नम्बर ४ सिरवारीमा हिँडिरहेको अवस्थामा घर्तीलाई पहिरोले पुरेको हो । घटनाबारे शनिबार आज बिहान इलाका प्रहरी कार्यालय पाछावाङ, रोल्पामा जानकारी प्राप्त भएको थियो ।
खबर पाउनासाथ घटनास्थलतर्फ प्रहरी वरिष्ठ नायब निरीक्षक नर सिंह खत्रीको कमाण्डमा ४ जनाको प्रहरी टोली परिचालन गरिएको छ । घटनास्थल प्रहरी कार्यालयबाट अन्दाजी ५ किलोमिटर उत्तरमा पर्दछ ।
