दाङ । दाङमा एक महिनामा सवारी दुर्घटनाबाट ७ जनाको मृत्यु भएको छ । फागुन महिनामा मात्रै सवारी दुर्घटनाबाट ७ जनाको मृत्यु भएको हो ।
जिल्ला प्रहरी कार्यालय दाङका अनुसार फागुनमा २५ वटा सवारी दुर्घटना भएका छन् भने दुर्घटनामा संलग्न सवारी साधनको संख्या ४८ रहेको छ । दुर्घटनामा ४५ जना घाइते भएको जिल्ला प्रहरी कार्यालय दाङका प्रहरी प्रवक्ता तथा डिएसपी रेशम बोहोराले जानकारी दिनुभयो ।
दुर्घटनाको मुख्य कारण तीव्र गति र मापसे (मद्यपान गरी सवारी चलाउने) रहेको डिएसपी बोहोराले बताउनुभयो । यस्तै ट्राफिक चेकजाँचका क्रममा प्रहरीले १ हजार ६४६ वटा कारबाही गरेको छ । सवारीसाधन कारबाहीबाट कुल १० लाख ७७ हजार ५ सय रुपैयाँ राजस्व संकलन भएको जनाएको छ ।
