तुलसीपुर। सवारी दुर्घटनामा निधन भएकी तुलसीपुर–११ कटाह निवासी कल्पना केसीको निधनको शोकमा तुलसीपुरस्थित राप्ती बबई क्याम्पसले आज शोक बिदा दिएको छ ।
स्नातक तह व्यवस्थापन संकाय दोस्रो वर्षमा अध्ययनरत छात्रा केसीको साउन २१ गते सवारी दुर्घटनामा परी निधन भएको हो । छात्राको निधनप्रति क्याम्पस परिवारले गहिरो दुःख व्यक्त गर्दै शोकसन्तप्त परिवारजनमा समवेदना प्रकट गरेको छ ।
क्याम्पस प्रशासनले शोक व्यक्त गर्दै आज क्याम्पसमा शोक बिदा दिने निर्णय गरेको छ । क्याम्पस प्रमुख गणेश पार्धेद्वारा जारी सूचनाअनुसार मङ्गलवार क्याम्पसका पठनपाठन लगायतका नियमित कार्यहरू स्थगित रहनेछन् ।
तथापि, स्नातक तह प्रथम वर्षको प्रवेश परीक्षा, बि एड चौथो वर्षको अभ्यास शिक्षणको बाह्य परीक्षण र बि बि एस चौथो वर्षको फाइनल प्रोजेक्ट वर्कको मूल्याङ्कन पूर्व निर्धारित समय तालिका अनुसार नै सञ्चालन हुने क्याम्पसले जनाएको छ ।
