दाङ। युवतीलाई खुकुरी देखाई कुटपिट गरेको भिडियो सामाजिक संजालमा सार्वजनिक भएपछि एक युवक पक्राउ परेका छन् । प्रहरीले तुलसीपुर उपमहानगरपालिका–२ भमके निवासी २४ वर्षीय रमेश ठाडा मगरलाई पक्राउ गरेको हो ।
पक्राउ परेका ठाडा मगरले एक युवतीलाई जंगलमा लगी खुकुरी देखाई डरधम्कीसहित कुटपिट गरेको भिडियो सामाजिक सञ्जालमा भाइरल बनेको छ ।
भिडियोको आधारमा इलाका प्रहरी कार्यालय तुलसीपुरबाट खटिएको टोलीले उनलाई उनकै घरबाटै पक्राउ गरेको हो । प्रहरीले उनको साथबाट विभिन्न प्रकारका लागुऔषध समेत बरामद गरेको लुम्बिनी प्रदेश प्रहरी कार्यालय तुलसीपुरले जनाएको छ । प्रहरीले उनको साथबाट प्रतिबन्धित औषधि रेगाम्याक्स १ ट्याब्लेट, ट्रोमो ४१ ट्याब्लेट, एन्टिकोप २ ट्याब्लेट र नाइट्राजोहम ५ ट्याब्लेट बरामद गरेको छ ।
यस्तै घटनामा संलग्न रहेको आरोपमा २१ वर्षीय जिबराज खत्रीलाई समेत नियन्त्रणमा लिई थप अनुसन्धान अघि बढाएको प्रहरीले जनाएको छ । पीडित युवतीको स्वास्थ्य अवस्था सामान्य रहेको छ ।
