तुलसीपुर । तुलसीपुर उपमहानरपालिका– ७ झुमरेमा रहेको हाम्रो पहुँच बहुउद्देश्यीय सहकारी संस्था लिमिटेडको निर्वाचन कार्यतालिका अनुसार आज आइतबार मतदाता नामावली प्रकाशन भएको छ । आज बसेको निर्वाचन समितिको बैठकले सहकारीको विधानअनुसार नयाँ नेतृत्व चयन गर्न निर्वाचन गराउने कार्यतालिका बमोजिम मतदाता नामावली प्रकाशन गरेको हो ।
कार्यतालिकाअनुसार आज बिहान ११ बजे मतदाता नामावली प्रकाशन गरिएको निर्वाचन समितिका संयोजक शान्तराज गौतमले जानकारी दिनुभयो । प्रकाशित नामावलीमा कुनै त्रुटि, दोहोरो दर्ता वा नाम छुट भएको भए सम्बन्धित व्यक्तिले निवेदनसहित भोली २० गते दिउँसो २ बजेसम्म मतदाता नामावली उपर दाबि विरोध वा सच्याउन सकिने संयोजक गौतमले बताउनुभयो ।
भोली बेलुकी ५ बजेसम्म दाबीविरोध छानबिन सम्पन्न गरिने र २१ गते बिहान ११ बजे अन्तिम नामावली प्रकाशन गरिने संयोजक गौतमले जानकारी दिनुभयो । त्यस्तै असोज २७ गते बिहान ११ बजेदेखि दिउँसो २ बजेसम्म उम्मेदवारको नाम दर्ता हुने छ । सोही दिन साँझ ४ बजेसम्म उम्मेदवारहरुको नामावली छानबिन गरिने र पौने ५ बजेसम्म प्रारम्भिक नामावली सार्वजनिक गरिनेछ ।
असोज २८ गते बिहान १० बजेदेखि सवा १२ बजेसम्म उम्मेदवारहरुको सूचीमा दाबीविरोध दर्ता गर्न सकिनेछ भने दिउँसो साढे १२ बजेदेखि २ बजेसम्म छानबिन गरिनेछ । सोही दिन साँझ ४ बजेसम्म उम्मेदवारले आफ्नो नाम फिर्ता लिन सक्ने व्यवस्था गरिएको छ ।
असोज २९ गते साँझ पौने ५ बजे उम्मेदवारको अन्तिम नामावली सार्वजनिक गरिनेछ । त्यसपश्चात् सोही दिनदेखि असोज ३० गते राति १२ बजेसम्म चुनाव प्रचार–प्रसार गर्न पाउने निर्वाचन समितिले जनाएको छ ।
कार्यतालिका अनुसार असोज ३१ गते निर्वाचन हुनेछ । मतदान बिहान ९ बजेदेखि दिउँसो ३ बजेसम्म चल्नेछ । मतदान सकिएलगत्तै सोही दिन मतगणना गर्ने समितिको तयारी रहेको छ ।
निर्वाचनमार्फत चार वर्षे कार्यकालका लागि १३ सदस्यीय सञ्चालक समिति र तिन सदस्यीय लेखा सुपरिवेक्षण समिति चयन गरिनेछन् । निर्वाचन समितिले निर्वाचनलाई निष्पक्ष, पारदर्शी, स्वच्छ र भव्य ढंगले सम्पन्न गर्ने तयारी भइरहेको जनाएको छ ।
