दाङ। दाङको तुलसीपुरमा रहेको हाम्रो पहुँच बहुउद्देश्यीय सहकारी संस्था लिमिटेडको १९ औं वार्षिक साधारणसभा आज चौथो दिन गुरुजजुर मावि रक्षाचौरमा भएको छ ।
संस्थाले आज तुलसीपुर–४ अन्तर्गत पर्ने नयाँबस्ती, सुनौलीपुर, रक्षाचौर, मजुवा, आँखा अस्पताल, गणेश टोल, सिमरा टोल र वडा नम्बर ७ अन्तर्गत पर्ने माताकुटीदेखि नयाँगाँउसम्म जाने सडकको उत्तरतर्फका टोलहरु नयाँगाँउ, गणेशपुर, गौझेनी, श्रीगैं, गनारी क्षेत्रका सबै सदस्यहरुका लागि गुरुजजुर स्कुलमा साधारण सभा गरेको हो ।
सोमबारदेखि शुरु भएको १९ औँ वार्षिक साधारणसभा २६ गतेसम्म संचालन हुने छ । संस्थामा करिब ५ हजार शेयर सदस्य भएको हुँदा वार्षिक साधारण सभा विभिन्न मितिमा विभिन्न स्थानमा भइरहेको छ । साधारणसभामा आज पनि नीति–कार्यक्रम, बजेट र लेखा प्रतिवेदनसहित १४ बुँदे प्रस्तावमा छलफल भएको संस्थाका अध्यक्ष शुक्रराज भण्डारीले बताउनुभयो । उहाँले संस्थाले यसवर्ष २ करोड १६ लाख ४४ हजार ५८१ खुद वचत गर्ने लक्ष्य रहेको बताउनुभयो ।
यसैगरी संस्थाका सचिव कृष्णप्रसाद पोखरेलले गत आर्थिक वर्षको नीति तथा कार्यक्रमको प्रगति समिक्षा प्रस्तुत गर्नुभएको हो । संस्थाको लेखा परिक्षण प्रतिवेदन संस्थाका लेखा सुपरिवेक्षण समितिका संयोजक सुर्यप्रसाद शर्माले प्रस्तुत गर्नुभएको हो ।
संस्थाका उपाध्यक्ष नमीकुमारी रेग्मीको स्वागत मन्तव्यबाट शुरु भएको साधारणसभामा आज पनि नीति–कार्यक्रम, बजेट र लेखा प्रतिवेदनसहित १४ बुँदे प्रस्तावमा छलफल भएको छ । कार्यक्रमको सहजीकरण संस्थाका प्रमुख कार्यकारी अधिकृत जनक भण्डारी र डिआर भण्डारीले गर्नुभएको हो । साधारण सभामा संस्थाका सल्लाहकार नारायणप्रसाद भण्डारीको अध्यक्षतमा तीन सदस्यीय अध्यक्ष मण्डल रहेको थियो । अध्यक्ष मण्डलको सदस्यहरुमा प्रणव कुमार खड्का र डिला कुमारी विश्वकर्मा रहनुभएको छ ।
साधारण सभामा संस्थाका सल्लाहकार ढुण्डीराज खनालले संस्था सबैको भएको र राम्रो र हाम्रो बनाउन सबैको सुझाव आवश्यक रहेको बताउनुभयो । साधारण सभामा शेयर सदस्यहरुले रासायनिक मलको पर्याप्तता हुनुपर्ने सुुझाव दिएका छन् ।
संस्थाको साधारणसभा भोलि तुलसीपुर उपमहानगरपालिका वडा नम्बर १०, ११, १२ र १३ का सबै सदस्यका लागि तुलसीपुर–१० को बनगाउँ स्कुलमा हुने भएको छ ।
