दाङ । फागुन महिनामा दाङबाट मात्रै झण्डै एक हजार जनाले पासपोर्ट बनाएका छन् । जिल्ला प्रशासन कार्यालय दाङले एक महिनाको अवधिमा ९ सय ९० जनालाई पासपोर्ट प्रदान गरेको जनाएको हो ।
जसमध्ये घोराहीबाट ४२६, इलाका प्रशासन कार्यालय तुलसीपुरबाट २७० र इलाका प्रशासन कार्यालय लमहीबाट २९४ जनाले पासपोर्ट बनाएका हुन् ।
फागुनमा ई–पासपोर्टका लागि १ हजार ५३ जनाले आवेदन दिएको सहायक प्रमुख जिल्ला अधिकारी साबित्रा पुनले जानकारी दिनुभयो । आवेदन दिनेमा तुलसीपुरका धेरै रहेका छन् । तुलसीपुरबाट ४०२ र घोराहीबाट ३९२ र लमहीबाट २५९ जनाले ई–पासपोर्टका लागि आवेदन दिएका हुन् ।
यस अवधिमा ४ हजार ३९५ जनाले राष्ट्रिय परिचयपत्रका लागि नाम दर्ता गरेका छन् । दर्ता गर्ने मध्ये घोराहीबाट १ हजार ९४७, तुलसीपुरबाट १ हजार ६६१ र लमहीबाट ७८७ जना रहेका छन् ।
कार्यालयले एक महिनाको अवधिमा ९ सय ४७ जनालाई नागरिकता वितरण गरेको जनाएको हो । जसमध्ये घोराहीबाट २९७, इलाका प्रशासन कार्यालय तुलसीपुरबाट ३७८ र इलाका प्रशासन कार्यालय लमहीबाट २७२ जनाले नागरिकता प्राप्त गरेका छन् ।
त्यसैगरी फागुन महिनामा कार्यालयले दुई जनालाई गैरआवासीय नागरिकता प्रदान गरेको छ भने एक जनाले नेपाली नागरिकता त्याग गरेका छन् ।
